الجزء التانى من ثوره مكتملتش .. وفى ناس كتيير مش عايزينها تكمل وعمالين يتحججوا ويحاولوا يبعدونا عن هدفها الأساسى بحاجات كتييييير الأستقرار والأقتصاد وعجلة الأنتاج والناس الغلابه اللى مش لاقيه تاكل بسبب اللى قاعدين فى التحرير وغيره وغيره .. ونسيوا أن السبب الأساسى فى كل الأسباب دى هما اللى قعدوا يسرقوا أكتر من 30 سنه فى البلد دى وفى شعبها الطيب .. وأن اللى فى التحرير دول هما اللى حاولوا ومات
منهم شباب كتيير عشان يوقفوا السرقه والظلم والطغيان فى البلد دى .. بيحلموا بأن بلدهم ( مصر) تبقى أحسن بلد فى العالم ودا من حقى وحقهم .. ولما بعد عشر شهوررررررر كامله .. اللى قتل وسرق ونهب فى البلد دى قاعد فى مستشفى خمس نجوم وبيتعامل وكأنوا لسه بيحكم وناس عشان بيطلبوا حقهم فى حياه كريمه يموتوا ويتعاملوا بالمنظر اللى بنشوفوا من أسبوع على شاشات التليفزيون ( الغير مصرى أكيد لأن التليفزيون المصرى لسه برضوا زى ماهوا قبل 25 يناير مبيشوفش الحقيقه ) يبقى لازم نكمل اللى بدأناه .. نطلب مجلس أنتقالى مدنى .. نطلب حد نشوف فيه أننا نقدر نحلم بتحقيق مطالبنا وهو بيحكم ..( ما بنى على باطل فهو باطل ) والأنتخابات اللى هتيجى فى ظل حكم متغيرش كتير عن الللى قبله وبيتعامل بنفس الطريقه وكأننا معملناش ثوره ولا حاجه الأنتخابات برضوا اللى هيعملها هتبقى زى اللى قبلها و طبعا كلنا فاكرين .. أنا نازل التحرير عشان أحافظ على الثوره اللى فخور أن شاركت فيها .. نازل عشان الناس اللى بقالهم أسبوع بيموتوا فى شارع محمد محمود وكأن مفيش أى تغير فى فكر الحاكم .. لو مختلف معايا فى الرأى دا حقك مدام كل اللى بنعملوا عشان خاطر بلدنا تبقى أحسن .. أى حد يقدر يكون فى التحرير معانا بكره ياريت ميترددش لأن .. لو مصممناش أن بلدنا تبقى أحسنا وثورتنا اللى بدأناها تنجح دلوقتى يبقى ولا كأننا علمنا حاجه والناس اللى ماتوا دول ماتوا ببلاش
MiDo
