ناس ٍ تبوس وناس تخجل وتنباس
فالعيد , واللي مايبوسك يناظرك !
والعيد مشكلته يجي قبل الأعراس
يعني عيون الناس لازم تصوّرك
ياللي عيونك كن باقي بها نعاس
صدّي عن العالم أنا خايف أخسرك !
تلّثمي , حطي عباية على الراس
شوفي لـ حسنك حل ! مانيب عاذرك
من كثر مابيدّك نعومة بلا قياس
ماودّها تطلع من ايدك أساورك
تتوقعين يزيّنك عقد الألماس ؟
العقد لامنّك لبستيه يشكرك !
الخد كنه ورد والقد ميّاس
مافيك عيب من أولك لين آخرك
ألا الوعد ! لاجاء بعد ضيق الأنفاس
تنسين ! هو قلبك أبد مايذكّرك ؟
ياطفلتي والعيد ماجاء لـ هالناس
العيد أحسّه جاء على شان خاطرك
حنّي على اللي عاش في قلبه الياس
لاقادر يشوفك ولاهو بـ جابرك
كل عام وأنتي أصدق الناس إحساس
وبخير أنا مادام فالصدر خنجرك !
